Hazrat Khwaja Hasan al-Basri rahmatullāhi alaihi :

Hazrat Khwaja Hasan al-Basri rahmatullāhi alaihi :

♦♦♦♦♦♦♦♦♦♦♦♦♦♦♦♦

****************

Alqaab :

‾‾‾‾‾‾‾‾

Shaikh-ul-Mashaa'ikh, Imaam-ul-Muttaqeen, Sayyed-ut-Taabi'een.

**************

Aap ki wilaadat 21 Hijri (642 A.D.) me Madeena munawwara me hui.

**************

Aap ke waalid ka naam Yaasar aur waalida ka naam Khaira hai.

Ye dono Faarsi (Irani) the.

Aap ke waalid ko Maysan (Iraq) me qaid karke Madeena laaya gaya. Kuchh waqt baad un ke maalik Zaid ibn Ṡaabit Ansaari ne un ko aazaad kiya aur 12  Hijri me Hazrat Abu Bakr Siddeeq radiy-Allāhu ta’ala anhu ke zamaane me unho ne Islaam apnaaya. Madeena me Ummul mo’mineen Hazrate Umme Salma radiy-Allahu ta’ala anha ki kaneez Khaira se un ka nikaah hua.

Aap ki wilaadat ke baad jab Aap ko Ameer-ul-mo’mineen Hazrat Umar Farooq radiy-Allāhu ta’ala anhu ke paas laaya gaya to unho ne aap ka haseen chehra dekhkar aap ka naam ‘Hasan’ rakha aur dua ki “Aye ALLĀH! Ise Aalime deen bana aur logo ka mehboob bana.”

**************

Aap ne Ummul mo’mineen Hazrate Umme Salama radiy-Allāhu ta’ala anha se ibtidaai ta’aleem haasil ki.

14 saal ki umr me Aap Hazrat Ali radiy-Allāhu ta’ala anhu ke mureed hue.

36 Hijri (657 A.D.) me Junge Siffin hui. Us ke baad Aap Madeena se Basra tashreef le gaye.

Aap ne Hazrat Hattaan bin Abdullāh ar-Riqashi se Qur'ān ki ta’aleem haasil ki aur Hazrat Abdullāh bin Abbaas radiy-Allāhu ta’ala anhu se Tafseer aur Tajweed ki ta’aleem haasil ki aur Ibn Surayyi at-Tameemi ki mehfilo me haazir rehkar taqreer suni.

Aap Hadeeṡ aur Fiq'h ke bhi maahir hue.

Aap ne bahot saare ashaaba ki sohbat se faiz haasil kiya, jin me Junge Badr me shareek hone waale 70 sahaaba bhi shaamil hain.

Hazrat Imaam Umar bin Abdul Azeez rahmatullāhi alaihi se Aap ke bahot achhe ta’aaluqaat the.

*****************

Shuru me Aap ne Faars (Iran) ke khilaaf jung me shirkat ki.

Magar baad me Aap sirf ibaadat wa riyazat  me aur ta’aleem e deen karne me masroof ho gaye.

**************

Shuru me Aap jawaahirat ki tijaarat ka kaarobar karte the. Istanbul (Byzantium) me baadshaah Caesar ke wazeer aur afsaro ke saath aap ke ta’alluqat the.

Ek baar aap tijaarat ke silsile me Istanbul gaye to waha ke wazeere aazam ne aap se kaha “Agar aap ijaazat den to aaj main aap ko mere saath ek khas jagah par lekar jaata hu.” Aap uske saath sehra (registan) me ek jagah par gaye. Aap ne dekha ki waha ek khaima banaaya gaya hai jis ko reshmi aur sunehari rassiyo se baandha gaya hai.

Kuchh der baad baadshaah ka sipaahiyo ka lashkar aaya aur us khaime ke chakkar lagaye aur kehne lage “Aye shehzaade! Agar hamare bas me hota to hum hamari jaan ki qurbani dekar tumhe bacha lete. Magar afsos ki yeh mumkin nahi tha. Hum apni jaan dekar bhi tumhe bacha nahi sakte the.”

Is ke baad taqreeban 400 aalimo aur falsafiyo ka majma aaya aur us khaime ke chakkar lagaye aur kehne lage “Aye shehzaade! Agar hamare bas me hota hum hamare ilm ke istemaal se tum ko bacha lete. Magar afsos ki yeh mumkin nahi tha. Hum apne ilm se bhi tumhe bacha nahi sakte the.”

Is ke baad taqreeban 300 buzurgo ka majma aaya aur us khaime ke chakkar lagaye aur kehne lage “Aye shehzaade! Agar hamare bas me hota hum apni sifarish se tumhe bacha lete. Magar afsos ki yeh mumkin nahi tha. Hum apni sifarish se bhi tumhe bacha nahi sakte the.”

Is ke baad taqreeban 200 haseen aurte apne haatho me sona, chaandi aur heere jawaahirat se bhare tabaaq lekar aai aur us khaime ke chakkar lagaye aur kehne lage “Aye shehzaade! Agar hamare bas me hota hum hamare husn o Jamaal aur is maal o daulat se tumhe bacha lete. Magar afsos ki yeh mumkin nahi tha. Hum hamare husn aur is maal o daulat se bhi tumhe bacha nahi sakte the.”

Phir khud baadshaah Caesar aage aaya aur us khaime ke chakkar lagaye aur kehne laga “Aye meri aankho ke noor, mere dil ke chain, mere sab se pyare bete, Tere baap ke haatho me kya tha? Agar main kuchh bhi kar sakta to kisi bhi tarah tumhe bacha leta. Magar tamaam aalim, falsafi, musheer, sipaahi, khaadim, haseen kaneeze, maal o daulat, khazaana aur tamaam saamaan har cheez bekaar rahi. Main kisi bhi tarah tumhe bacha nahi saka. Dua hai ki agle saal tak tumhe sukoon mile.”

Yeh kehkar woh sab ke saath waapas laut gaya.

Aap ne us wazeer se puchha to pata chala ki “Baadshaah ka jawaan ladka tha jo bahut khubsurat, bahut ilm waala, bahaadur aur taaqatwar tha. Achaanak woh beemaar hua. Koi tabeeb ya hakeem us ki beemaari ka ilaaj nahi kar sake. Aakhir me woh dunya se rukhsat ho gaya aur yaha is khaime ke andar dafn kiya gaya. Tab se har saal baadshaah in sab ko lekar yaha aata hai aur sab is tarah chakkar lagaakar yeh sab baaten kehte hain.”

Is waaqye ka aap par aisa aṡar hua ki Basra aane ke baad baaqi ki zindagi me aap kabhi kisi bhi baat par hans nahi paaye.

Aue hamesha taqwa aur parhezgaari ke saath zindagi guzaari aur khauf e khuda ke saath maut, qabr aur qayaamat ko yaad karte rahe.

**************

Ek baar Aap ne ek nau-jawaan ko zor se hanste hue dekha to aap ne farmaaya “Kya tum pul siraat ko paar kar liya hai?” Us ne kaha “Nahi.” Aap ne kaha “Kya tum jaante ho ki tum jannat me jaaoge ya jahannam me?” Us ne kaha “Nahi.”

Aap ne farmaaya ‘Phir tum is tarah kyun hanste ho?’

Us nau-jawaan par is naseehat ka aisa aṡar hua ki woh phir kabhi zor se hansa nahi.

**************

Ek baar Aap ne namaaze janaaza padhai. Jab log dafn karke Qabr durust kar chuke to Aap us qabr ke qareeb baithkar bahot roye.

Phir Aap ne haazireen se farmaaya ki “Aye Logo! Suno, Dunya ki aakhir qabr hai aur Aakhirat ki awwal qabr hai. Phir tum aise aalam se kyun nahi darte jab ke tumahra awwal wa aakhir yehi hai? Aye ghaafilo! Awwal wa Aakhir ko durust kar lo.”

Aap ke is Wa’az se mutaṡṡir hokar sab log rone lage.

**************

Aap ke pados me Sim'oon naam ka ek majoosi rehta tha. Jab woh sakraat me tha to Aap ke dosto ne us ke ghar par jaakar ke liye iltija ki. Aap us majoosi ke ghar par gaye to dekha ke woh bistar me hai aur aag aur dhuen ki wajah se us ka chehra kaala ho gaya hai.

Aap ne us se farmaaya “Tum ne puri zindagi aatish parasti ki hai. Ab aakhri waqt me to musalman ho jaao, ALLĀH ta’ala tum par raham farma de.”

Us ne kaha “Mujhe 3 baato se ta’ajjub hota hai – (1) Log dunya ko bura kehte hain magar puri zindagi use haasil karne me guzaarte hain. (2) Log jaante hain ki ek din maut aani hai aur dunya se chale jaana hai, magar maut ke baad ke liye koi tayyaari nahi karte. (3) Log maante hain ki ek din Rab ki baargaah me haazir hona hai, magar us ki raza ke liye koi amal nahi karte.”

Aap ne farmaaya “Tum jo keh rahe ho wo aam logo ke liye sahi hai. Magar mo’min ALLĀH ta’ala ki waahadaaniyat aur qudrat jaanta hai aur hamesha us ki raza ke liye us ki ibaadat karta hai.”

Phir Aap ne farmaya “Tum 70 saal se aatish ki ibaadat karte ho aur maine kabhi is ki ibaadat nahi ki hai. Agar hum dono ko dozakh me daala jaaye to in shaa Allāh ALLĀH ki rahmat se mujhe koi nuqsaan nahi hoga. Yeh aag ALLĀH ta’ala ki paida ki hui hai. Hum dono is me haath daalkar dekhte ki aag kise jalaati hai. Is ke baad tum ALLĀH ta’ala ki qudrat jaan jaaoge.”

Yeh kehkar aap ne aag me apna haath daala to aag ne aap ko kuchh bhi nuqsaan nahi kiya. Yeh dekhkar majoosi ko ta’ajjub hua aur use haqeeqat pata chali. Us ne kaha “Maine to puri zindagi aatish-parasti ki hai. Ab to chand saanse baaqi hai. Main kya karun?”

Aap ne farmaaya “Foran musalman ho jaao.”

Us ne kaha “Aap agar mujhe likhkar den ki ALLĀH ta’ala mujhe azaab nahi dega to main eimaan laaun.”

Aap ne use ek kaagaz par likhkar diya. Phir us ke kehne par Basra ke kuchh logo ko gawaah banakar un ke bhi dastkhat karwaaye.

Us majoosi ne rote hue tauba ki aur eimaan laaya. Aur phir aap se kaha “Jab mera inteqaal ho jaaye to aap mujhe ghusl dekar tajheez aur tadfeen karna aur is kaagaz ko meri qabr me rakh dena.”

Aap ne us ki wasiyat ke mutaabiq us ko ghusl diya aur kafan dekar namaaz e janaaza padhaai aur us ke liye dua e maghfirat ki aur dafn karte waqt us kaagaz ko qabr me us ke saath rakha.

Phir Aap jab apne ghar aaye aur raat ko sone lage to aap ko khayal aaya ki “Main khud ke hashr ke baare me nahi jaanta to main us aadami ke baare me kaise jamaanat de sakta hu.” Raat ko khwaab me Aap ne Simeon ko dekha. Woh nooraani chehre ke saath sar par taaj pehne hue aur jannati libaas pehne hue jannat me ghum raha hai. Aap ne use puchha “ALLĀH ne tere saath kya muamala kiya.” Us ne kaha “ALLĀH ne aap ki dua se mujh par raham farmakar mujhe bakhsh diya. Us ne aap ki jamaanat ki laaj rakhi. Ab mujhe is ki zaroorat nahi hai. Is liye main ise waapas de raha hu.”

Jab aap ki aankh khuli to aap ne dekha ki woh kaagaz aap ke haath me tha. Yeh dekhkar khushi se aap ki aankh me aansoo aa gaye aur kehne lage “Aye ALLĀH! Tu bada meharbaan aur raham farmaane waala aur qaadir e mutlaq hai. Tera ehsaan hai ki tune meri laaj rakh li.”

****************

Karaamat :

‾‾‾‾‾‾‾‾‾‾‾‾‾‾

(1) Ek martaba Aap ek jama’at ke saath Hajj ke liye rawaana hue. Raaste me ek shakhs ko bahot pyaas lagi. Paani talaash karte hue ek kuven ke paas pahonche magar dol rassi ka intezaam na tha. Aap ne farmaaya ke “Main namaaz padhta hu. Tum log paani pee lena.”

Aap ne namaaz shuru ki aur kunve ka paani josh maarkar kunve ke upar tak aa gaya. Sab logo ne paani piya, wuzu kiya. Magar ek shakhs ne dusro se chhupa kar ek bartan me bhi paani bhar liya. Jis ki wajah se paani waapas kuven ki teh me chala gaya.

Jab Aap namaaz se faarigh hue to farmaaya “Tum ne Khuda par tawakkul nahi kiya. Is liye paani waapas kunve ki teh me chala gaya.”

(2) Hazrat Abdullāh rahmatullāhi alaihi bayaan karte hain ke :

Ek roz subah uthkar main namaaz ada karne ke liye nikla. Jab main Hazrat Khwaja Hasan Basri me ki masjid par aaya to darwaaza band tha aur Hazrat dua maang rahe the.

Maine socha ke shaayad andar Hazrat ke ahbaab maujood honge. Main thodi der thehra raha. Phir subah saadiq hone ke baad maine darwaaze par haath rakha to darwaaza khul gaya. Jab main andar gaya to Hazrat ko akela paaya. Mujhe ta’ajjub hua.

Jab namaaz se faarigh hua to maine ye saara maajra un se bayaan kiya aur kaha ke “Khuda ke waaste mujhe is haal se khabardaar kijiye ke aap ki dua par Aameen kehne waale kaun the?” Aap ne farmaaya ke “Kisi se mat kehna. Maine har Jum’aa ki raat Jinno ko wa’az kehne ke liye muqarrar kar rakhi hai. Wo har jume ki raat ko yaha aate hain aur main un ke saamne wa’az kehta hu aur phir dua maangta hu aur wo Aameen kehte hain.”

**************

Aqwaal :

‾‾‾‾‾‾‾

Aap irshaad farmaate hain :

(1) Aqeeda sirf  insaan ki soch ka naam nahi hai balke yeh woh cheez hai jo dil me basa ho aur apne amal se zaahir kiya jaaye.

(2) Jis ke paas Tehzeeb nahi us ke paas ilm nahi, Jis ke paas Sabr nahi us ke paas Deen nahi aur Jis ke paas Rab ki pehchaan nahi wohs Rab ke qareeb nahi.

(3) Namaaz, Tilaawat e Qur'ān aur Zikr me khushi talaash karo. Agar in me se kisi me khushi nahi mil rahi hai to jaan lo ki rahmat ke darwaaze tumhare liye band ho gaye hain.

(4) Zindagi ke 3 din hain :

Guzra hua kal apne saath woh sab lekar guzar gaya jo kuchh hua tha.

Aane waala kal jo tum ne abhi dekha hi nahi.

Aaj ka din hi amal karne ke liye tumhare haath me hai.

(5) Dunya ek sawaari ki tarah hai. Agar tum us par qaaboo rakh sake to tum manzil tak pahunch jaaoge aur agar us par qaboo nahi rakh sake to woh tumhe barbaadi ki taraf le jaayegi.

(6) Dunya ki har khushi chhoti aut aarzi hai. Us ki laalach me phanskar aakhirat ki taraf se apni tawajjoh mat hataao. Aur yeh mat kaho ke kal neki karenge. Kyun ki tum yeh nahi jaante hai ke kab baargah e ilāhi me haazir hone ka bulaawa aa jaayega.

(7) Aqlmand bolne se pehle sochta hai aur Be-waqoof bolne ke baad sochta hai.

(8 ) Mo’min woh hai jo nek amal karta hai, Magar phir bhi khaufzada rehta hai.

Gunahgaar woh hai jo gunaah karta hai aur itminaan se rehta hai.

(9) Aajizi yeh hai ke tu jis kisi ko dekhe apne aap se afzal samjhe.

(10) ALLĀH ta’ala jis ko zaleel o khwaar karna chaahe use daulat ki khwaahish me mubtila kar deta hai.

(11) Jannat ke muqaabale me badi se badi Ne'amat haqeer hai aur Dozakh ke muqaabale me badi se badi Museebat aasaan aur qaabile bardaasht hai.

(12) Woh bewaqoof hai jo dunya banaane ke liye aaqibat ka thikaana kharaab kare.

(13) Dunya ki mohabbat aur laalach dil o dimaag par sawaar ho jaaye to samajh lo ke dil murda ho chuka hai aur saare nek aamaal zaaya aur barbaad ho jaate hain.

(14) Dunya ek khwaab ki tarah hai, Khwaab dekhne waala achhi cheez dekhkar khush hota hai lekin jab bedaar hota hai tab haqeeqat us ke saamne hoti hai.

(15) Ulama ki miṡaal sitaaro jaisi hai, Jab wo chamakte hain og un se raah paate hain aur jab chhup jaate han tab log pareshaan ho jaate han.

**************

Aap ke shaagirdo me Hazrat Maalik bin Deenaar, Imaam Ayyoob al-Sakhtiyani, Farqad as-Sabakhi aur Humaid at-Tawil mash'hoor hain.

**************

Aap ke 3 saahabzaade hain :

Ali, Muhammad aur Saeed.

**************

Aap Hazrat Maula Ali al-Murtaza radiy-Allāhu ta’ala anhu ke 4 khalifa me se 1 hain.

Aap ke khulfa :

(1) Hazrat Khwaja Abdul Waahid bin Zaid rahmatullāhi alaihi,

(2) Hazrat Khwaja Habeeb Ajami rahmatullāhi alaihi.

♦  Qaadri, Chishti, Suharwardi, Rifa'i, Badawiya aur Maulawi silsile Aap ke silsile se ta’alluq rakhte hain.

**************

Aap ka wisaal 5 Rajab 110 Hijri (October 728 A.D.) ko 89 saal ki umr me Jum’aa ke roz hua.

Aap ke janaaza me Basra ke tamaam log shareek hue aur Basra ki tawaarikh me pehli baar Basra ki Jaame masjid me namaaze asr me koi aadami namaaz ke liye maujood nahi tha.

Aap ka mazaar Basra (Iraq) me hai.